學生手冊．收生及課堂政策
報名前請睇清楚。以下內容摘自《新培教育學生手冊》（2025 年 9 月更新）。有唔明白，隨時 WhatsApp 問我哋。
1. 報名及繳費
新生報名流程
- 先向 admin 同事了解課程
- 填寫學生資料，如有介紹人請註明（可享 $200 優惠）
- 繳費及獲取單據
- admin 同事會 WhatsApp 發送訊息確認報名
好重要：請將 admin 電話 5408 6242 加入聯絡人。冇加嘅話會錯過中心訊息，包括課堂提醒同各種優惠。
舊生續報流程
- 先向 admin 同事了解課程
- 通知 admin 曾有報讀
- 繳費及獲取單據
- admin 同事會 WhatsApp 發送訊息確認報名
繳費方法
- 親臨中心現金繳費 —— 建議保留收據至少 3 個月，以保障個人權益。
- 電子支付 —— 支援 ATM 轉賬及轉數快（FPS）。收款資料由 admin 直接提供；支付後請將截圖或相片 WhatsApp 傳畀 admin（5408 6242）核對。
留位
如想繼續報讀下個月，請喺上第三堂嗰陣交下月學費，否則不作留位。
月中報名點計？
課堂以每月 4 堂為一個單位。若喺月中報名，只能報讀餘下堂數，學費按比例計算，而且該月不能使用優惠 —— 要等下月續報才能享有。
優惠
孖住報、介紹同學、新生優惠、中英數組合、多報優惠等，詳情請睇 報讀優惠。所有優惠必須報足 4 堂才能使用。
2. 課堂安排
- 非考試月份：每月只上四堂（首四星期），其後嗰個星期唔使上課。
- 考試月份：配合學生考試，另外安排上課時間。
- 每月上堂日子為 1–28 日，每一期以 4 堂為一個單位。
- 公眾假期：中秋節正日（農曆八月十五）、聖誕（12 月 24–26 日）、農曆年初一至初七及其他公眾假期，安排以中心公佈為準。
3. 病假
- 須於課堂前 2 小時通知 admin（WhatsApp／致電 5408 6242），並附上有效日期嘅醫生紙，並於 7 日內同 admin 約實補堂時間。
- 如未能出示有效醫生紙，本中心會以事假處理；或同學可選擇到中心取回該課堂筆記，唔補堂。
- 住院不超過兩星期：學生／家長須喺一星期內提供住院證明，我哋會按病假補堂程序安排補堂。
- 住院超過兩星期：學生／家長須喺一星期內提供住院證明，我哋會安排退回住院期內所有課堂學費，所有補堂會取消。退款須按下方退款守則辦理。
4. 事假（學校活動、補課、考試測驗等）
- 須提早 24 小時通知 admin，並於 7 日內約實補堂時間。
- 每月限一次補堂。建議每月繳費前先告知請假及調堂安排。
- 如不足 24 小時前通知或直接缺席：須繳付 $50 行政費，再同 admin 安排補堂（7 日內約實），確定後不作更改。
- 如需再次更改／請假／缺席，須再繳付 $50 行政費（病假除外）。
- 或同學可選擇到中心取回該課堂筆記，唔補堂。
- 所有與老師嘅請假對話記錄，都必須同時通知 admin 方才作準。
- 如請假／缺席後 7 日內無約實補堂時間，將視為放棄補堂，同學可到中心取回該課堂筆記。
- 所有 Oral 會話班不設調堂／補堂／退款或扣堂。
簡單記法：病假 → 課前 2 小時通知 ＋ 醫生紙；事假 → 提早 24 小時通知。兩者都要喺 7 日內約實補堂。遲通知或缺席 → $50 行政費。
5. 豁免限額及補習證明
每學期一次豁免機會
一個學期內有一次豁免機會，可於特殊情況下使用：
- 請病假但無法提供有效醫生紙（例如臨時低燒／頭痛／肚痛）
- 臨時家中急事無法上課（少於 24 小時通知）
使用豁免可免付行政費安排補堂，同樣需 7 日內約實補堂時間。使用時請告知 admin，將會被記錄。豁免機會有限，請慎重使用。
學期劃分：上學期 9–1 月；下學期 2–6 月；暑期班 7–8 月。
補習證明
學生如有需要，可向中心申請「補習證明」（電子檔），以向學校或其他單位證明已報名補習課程而無法出席活動（例如臨時被留堂、被告知需練習等）。
申請流程：WhatsApp／WeChat 向 admin 申請，並告知需要證明嘅補習科目、日期及時間。admin 查閱訊息後將即時準備及發送補習證明。
6. 調堂安排及流程
最著數嘅做法：若你喺交費前已經知道該月需要請假，請喺交費前同 admin 約好補堂日子及時間（電子支付則喺付款前透過 WhatsApp 約好）。呢個係唯一唔需要證明、亦冇次數限制嘅請假補堂方式。
- 每科都有固定補堂時間，中心會將補堂時段發送畀學生。
- 成功請假後，admin 會提供可補堂嘅時段畀同學選擇。
- 請小心選擇 —— 一旦確認咗補堂時段，就唔可以再更改。
- 如同學喺補堂時間冇出現，將視為放棄補堂，可取回課堂筆記，該課堂不會再獲安排補回。
- 補堂老師有機會與常規課程老師不同，但使用嘅筆記及教授內容會係一樣。
7. 因老師請假而調堂嘅補償
如學生未能出席補堂，學費將不獲退還。學生只在以下情況才可獲退還該堂學費：
- 老師請假，而同學又未能在提供嘅時段補堂
- 同學因為本中心沒有通知或其他錯失而令其失去補堂機會
- 因惡劣天氣取消課堂，而同學又未能在提供嘅時段補堂
8. 退款流程
- 學生須喺收到本中心確認退款通知後一個月內辦理退款手續。
- 不設網上退款，本中心以現金方式退還費用，學生須親身到中心辦理。
- 如未能喺一個月內辦理，逾期學費不會退還。
- 辦理時須填寫退款證明單並親筆簽名同意，正本由中心留底作已退款證明。
- 已辦理退學費手續嘅課堂會取消，唔需要補堂。
- 如有任何爭議，新培教育擁有最終決定權。
9. 惡劣天氣課堂安排
（2025 年 9 月修訂版）
一、幾時停課？睇警告訊號幾時仍然生效
以下時間點，如果警告訊號仍然生效，相應節數即停課：
星期一至五（常規課程）
| 訊號仍然生效時間 | 停課節數 |
|---|---|
| 下午 3:30 | 下午 4:30 – 5:50 |
| 下午 5:00 或之後 | 全日停課 |
星期六 / 日及其他特別課堂時間（包括暑期課程）
| 訊號仍然生效時間 | 停課節數 |
|---|---|
| 上午 9:00 | 上午 9:50 – 11:10 |
| 上午 10:00 | 上午 11:10 – 12:30 |
| 上午 11:30 | 下午 12:30 – 1:50 |
| 下午 1:00 | 下午 1:50 – 3:10 |
| 下午 2:00 | 下午 3:10 – 4:30 |
| 下午 3:30 | 下午 4:30 – 5:50 |
| 下午 5:00 或之後 | 全日停課 |
二、邊個訊號要停課？
暴雨警告訊號
黃色暴雨如常上課
紅色暴雨課堂暫停
黑色暴雨課堂暫停
熱帶氣旋警告訊號
1 號風球如常上課
3 號風球如常上課
8 號或更高課堂暫停
停咗嘅課點算？會由分校同事聯絡安排補堂，不作順延。
如同學未能在提供嘅時段補堂，可按上方第 7 節「因老師請假而調堂嘅補償」處理。
10. QR code 點名
QR code 點名
- 所有同學進入班房前，需要先到 reception 掃 QR code 點名。
- 請提前準備好，打開 QR code 畀 admin 姐姐掃。
- 冇電話嘅同學，請向櫃檯 admin 姐姐拿取 QR code 複印本。
- 建議喺 WhatsApp 中將 QR code 訊息加上星號，方便每次快速打開。
11. 網上影片課程（虛擬商品）
- 付款成功後，學生可登入網站／平台會員帳戶即時觀看已購買嘅課程影片。
- 每堂約 1 小時 20 分鐘（視課程設計而定）。
- 影片課程不受時間限制，每條影片可觀看 3 次，學生可自行安排學習進度。
本頁內容摘自《新培教育學生手冊》（2025 年 9 月更新）。如有更新，以中心最新公佈為準。如有任何爭議，新培教育保留最終決定權。